كان إيه جرى ؟

وتدور بينا الأيام .. وياترى
واخدانا لقدام .. وللا ..
جابتنا لورا
نمسك أحلامنا وبلهفة نسألها
كان إيه جرى ؟
ما كنت ملازمانا
ودايماً ويّانا
ليه دلوقت بقيتي ورانا
نبص لفوق .. نلقاكي
يمامة بنية
طايرة .. وإحنا معاكي
طايرين في سماكي
على هوانا .. وهواكي
حطيتي على غصن
نزلنا في لحظة ويّاكي
بصينا .. لقينا نهر غدير
وبحر كبير ..
أمواجه هدير ..
واليمامة طارت
ولسة بتطير
باصة علينا من بعيد
والقلب ماعادش سعيد
محتاج لنبض جديد
قلب حديد
يطلّع أحلامنا لقدام
ينور الأيام
ولانرجعش نقول ..
كان إيه جرى ؟
*****************
وقوارب في بحرنا
راسية وسابحة
مرصوصة سبحة
تهبط وتعلا مع موجة حزننا
تحز في قلبنا ..
وتقطع .. سكينة دابحة
نبكي .. تنزل دموعنا مطر
ناخدها على كفنا
وندب برجلنا
تزلزل أرضنا .. تهزنا
وتيجي من وراها توابع
تهرب دموعنا من بين الصوابع
نبص على حلمنا
نلقاه ورا .. واقف متابع
بيقوللنا ..
كان إيه جرى ؟
*********************
كان الأمل معانا يجري
في كل الأماكن
كان الحلم فينا مزهزه وساكن
نقوم وفي ثانية نحققه
قومة بركان ثاير
يهد مدن ومساكن
ليه دلوقت بنقول ..
أصل .. وبس .. ولكن
ليه بركانّا خمدان وساكن
ليه صارت أحلامنا جوانا ..
لونها داكن
هربت منا الأماكن ؟
وللا إحنا اللي فتناها قوام
وقلنا خلاص .. راحت الأيام
وكان إيه جرى ؟
********************
صحينا فجأة من حلمنا
فوقنا ودلوقت بنسأل
مين باع .. ومين إشترى
مين ضاع .. ومين إفترى
مين حلمه حققه ومين تاه
ومين لسه عنده المقدرة
مين لسه فاكر إن حلمه قدامه
وباقي فيها كتير أيامه
وكل البشر خدامه
وهما مقعدينه .. ملك
على كرسي إعدامه
مين بعد خريف وشتا عمره
فاكر لسه هاييجي ربيع
وأرض أحلامه بأمره
هاتتفجر ينابيع
والناس شاريه مش بتبيع
وحلم سنين عمره الطويل
لساه طفل رضيع
سامع صرخته جواه
صرخة إبن أيام وأسابيع
صرخة بتقول للجميع
كان إيه جرى ؟
********************
مهما تحقق يا بن آدم
حلمك هايفضل ورا
أو بعيد .. بعد القمر
بعد عطارد والمشترى
أنا حلمي من كتر ما حلمته
داب وإتهرى
غاص في الأرض وإندفن
بعد ليلة مغبرة
بغيمة على قمرها .. ممطرة
وماعدتش حزنان على سنيني
اللي راحت ورا
وماعدتش بعدها راح أسأل أيامي
كان إيه جرى ؟